Pas njoftimit të kryeministrit Albin Kurti për rritjen e pagave për sektorin publik nga viti i ardhshëm, kreu i Lidhjes Demokratike të Kosovës (LDK), Lumir Abdixhiku, ka reaguar me një premtim të tij për ndryshime më të thella.
Përmes një postimi në Facebook, Abdixhiku ka premtuar se koeficienti i pagave do të bëhet 150 euro që në javën e parë të qeverisjes së tij.
“Po e përsëris, që në javën e parë të qeverisjes sime, koeficienti i pagave do të bëhet 150 euro! Ndryshimi po vjen!” ka shkruar Abdixhiku.
Ndërsa, kryeministri Kurti, ka deklaruar në konferencë për media të martën, se nga viti 2025 do të ketë rritje të pagave në sektorin publik, për 55 euro më shumë duke filluar nga janari, dhe për 110 euro nga muaji korrik i vitit 2025.