Kryetari i Lidhjes Demokratike të Kosovës, Lumir Abdixhiku, ka deklaruar se nëse në kuadër të një marrëveshjeje politike i takon LDK-së të propozojë kandidatin për president të vendit, emri që do të propozohej do të ishte ai i Vjosa Osmanit.
Abdixhiku tha se LDK-ja nuk mund të jetë pjesë e një marrëveshjeje ku një parti i mban të gjitha pozitat kryesore shtetërore, ndërsa partnerët e mundshëm nuk kanë rol në vendimmarrje.
Ai theksoi se para diskutimeve për pozita duhet të ketë pajtim për parimet, programin qeverisës dhe orientimin e shtetit.
“Shumë më e rëndësishme sesa pozitat, për ne është shumë më e rëndësishme të dimë çfarë do të ndodhë me Republikën e Kosovës në katër vitet e ardhshme. Më besoni që nuk jemi për privilegje individuale. Fillimisht Republika, pastaj njerëzit. Fillimisht flasim për parime, për program dhe për orientimin e Republikës, pastaj për pozitat. LDK do të qëndrojë në opozitë dhe do të bëj një opozitë të dinjitetshme”, tha ai në emisionin “Rubikon” në Klan Kosova.
I pyetur nëse Vjosa Osmani do të ishte kandidatja e LDK-së për presidente në rast se kjo pozitë do t’i takonte partisë së tij, Abdixhiku u përgjigj prerazi.
“Nëse kërkohet emri i presidentit nga LDK-ja, natyrisht që do të ishte Vjosa Osmani. S’ka diskutim”.
Abdixhiku shtoi se Kosova nuk ka luksin të humbasë njerëz me përvojë institucionale dhe vlerësoi rolin që Osmani ka ushtruar në krye të shtetit.
Ai gjithashtu tha se ka përfunduar koha kur, sipas tij, partitë politike kërkonin vota me një kandidat dhe më pas merrnin vendime të tjera në tavolinat e negociatave.