Kryetari i Lidhjes Demokratike të Kosovës (LDK), Lumir Abdixhiku, ka konfirmuar se do t’i përgjigjet pozitivisht ftesës së kryetarit të Lëvizjes Vetëvendosje (LVV), Albin Kurti, për një takim.
Abdixhiku bëri të ditur se gjatë ditës ka pranuar një letër zyrtare nga Kurti, me ftesë për një takim në formatin “1+1”.
“Unë sot kam marrë një letër ftesë për takim me kryetarin e LVV-së, z. Kurti, në formatin 1+1. Pra, këtë herë do të takohemi 2 me 2 dhe do t’i përgjigjem pozitivisht kësaj ftese”, ka deklaruar Abdixhiku.
Ai theksoi se kjo është hera e parë që ka pasur komunikim zyrtar me Kurtin që nga përfundimi i zgjedhjeve parlamentare.
Abdixhiku njoftoi gjithashtu se LDK-ja do të dalë me një komunikatë zyrtare lidhur me këtë çështje pas mbledhjes së organeve të partisë.