“Përkundër paralajmërimeve tona të ngritura në vazhdimësi, Qeveria e Kosovës është dëshmuar e pavullnetshme dhe e paaftë të veprojë në kohë”.
Kështu ka thënë Kryetari i Lidhjes Demokratike të Kosovës, Lumir Abdixhiku përmes një videoje të publikuar në rrjetin social Facebook në të cilën ka prezantuar planin e LDK-së për energjinë elektrike.
Abdixhiku ka thënë se plani i LDK-së kërkon nga Qeveria e Kosovës që kjo e fundit të asistojë familjet kosovare në sigurimin e përballueshëm të resurseve alternative të ngrohjes, çmimi i të cilave sipas Abdixhikut, pothuajse është trefishuar. Ai ka theksuar se riparimi i Bllokut A5 në KEK është emergjent.
“Miliona euro tuaja shpenzohen sot në importin e energjisë elektrike, përderisa kapacitetet tona energjetike nuk janë në funskion të plotë. Në fund, përderisa të gjitha vendet e BE-së dhe rajonit kanë plane konkrete kursimi, Qeveria e Kosovës është ende në pushim. Na duhet urgjentisht plan i detajuar për kursimin e energjisë në të gjitha institucionet e vendit, siç na duhet edhe një fushatë ndërgjegjësimi për qytetarët tanë e dimrin e vështirë që do ta kemi bashkë”, ka thënë ai.
Ndër të tjera, Abdixhiku ka kërkuar nga Qeveria e Kosovës që kjo e fundit të pranojë propozimin i cili do mund të ndihmonte qytetarët e Kosovës.