Kryetari i Federatës së Futbollit të Kosovës (FFK), Agim Ademi, ka njoftuar të martën se ka filluar eventi “Tournament Prishtina 2023” që zhvillohet nën patronatin e FFK-së.
Përmes një postimi në Facebook, Ademi ka treguar se ky turne do të zhvillohet në sheshin “Zahir Pajaziti” në Prishtinë dhe do të zgjasë deri më 24 korrik.
“Në këtë turne marrin pjesë 32 ekipe seniore, 16 ekipe të fëmijëve, si dhe ekipe të vajzave, institucioneve, por edhe të personave me nevoja të veçanta,” ka shkruar i pari i shtëpisë së futbollit kosovar.
Sipas tij, për dallim nga viti i kaluar interesimi është rritur për nga numri i ekipeve pjesëmarrëse.
Ademi ka ftuar shikuesit që ta ndjekin nga afër këtë turne.