Po vazhdojnë punimet në aeroportin ndërkombëtar të Vlorës (VIA).
Së fundmi edhe kryeministri i Shqipërisë Edi Rama, në faqen e tij në Facebook, ka postuar foto nga vendpunimi. I njëjti është shprehur se aeroporti po merr formë dita ditës.
“Aeroporti Ndërkombëtar i Vlorës ka filluar të duket në sipërfaqe e që po merr formë dita-ditës, për ta shndërruar atë në një tjetër portë të madhe për të gjithë vizitorët që zgjedhin Shqipërinë për ta vizituar e për të pushuar”, ka shkruar Rama.
Ky aeroport po ndërtohet nga kompania “Mabetex International”, kompani kjo e cila është në pronësi të Behgjet Pacollit. Ky i fundit muaj më parë ka njoftuar vetë, se është nder dhe privilegj për të dhe kompaninë e tij, që ta ngrisë flamurin e Mabetex International në trojet shqiptare.
“Në fakt, Mabetex International, me investimet e saj do të ndërtoj Aeroportin e Vlorës. Projekti i Mabetex u zgjodh si projekti më i mirë nga të gjithë ofruesit”, ka shkruar Pacolli.
Me këtë projekt parashikohet të rriten lidhjet ajrore të Shqipërisë. Pastaj konkurrenca mes VIA-së dhe aeroportit ndërkombëtar të Tiranës (TIA) do të ulë çmimet e fluturimeve, dhe kjo çon në rritjen e numrit të pasagjerëve.
Ky aeroport do ti shërbej rritjes së ekonomisë së Shqipërisë dhe do të rris numrin e të interesuarve të investojnë në jugun e vendit.