Për të gjashtën ditë me radhë, në veri të Kosovës disa rrugë vazhdojnë të jenë të bllokuara. Kamionët vazhdojnë të bllokojnë rrugën në fshatin Rudar, në Zveçan.
Që nga e shtuna e 10 dhjetorit, serbët lokalë kanë ngritur barrikada në shenjë pakënaqësie me arrestimin e një ish-pjesëtari serb të Policisë së Kosovës, që autoritetet në Kosovë thonë se ka organizuar sulmet ndaj zyrave të Komisionit Qendror të Zgjedhjeve në veri.
Forcat e policisë së Kosovës vazhdojnë të jenë të dislokuara në veri.
Përkundër kërkesës së ndërkombëtarëve për heqjen e barrikadave në Veri, të njëjtat ende nuk janë larguar.
Madje, të mërkurën e 14 dhjetorit, një barrikadë e re është vendosur në fshatin Zupç, të komunës së Zubin Potokut.
Siç mëson Portali Dukagjini, barrikada është vendosur në një rrugë alternative, për ta pamundësuar ndërrimin e pjesëtarëve të Policisë së Kosovës, që po patrullojnë në atë pjesë.
Por, bëhet e ditur se rruga për policet edhe shqiptaret ne fshatin Çabër është e lirë nuk është e bllokuar.
Dy rrugët për në fshatin Çabër janë të lira, të kalueshme (rruga kryesore për në Bërnjak dhe rruga alternative që fillon nga fshati Gushavc). Po ashtu rruga që Policia e përdor për të patrulluar dhe për të kryer ndërrimin është e lirë.
Kjo është dita e pestë që rrugët në veri të Kosovës, janë bllokuar duke vendosur barrikada.
Në atë pjesë të vendit janë bllokuar rrugët kryesore në Leposaviq, Zveçan e Zubin Potok dhe duke pamundësuar qarkullimin me vetura.
Serbët lokalë në veri të Kosovës ngritën barrikada më 10 dhjetor, në shenjë kundërshtimi lidhur me arrestimin e Dejan Pantiqit, ish-pjesëtar i Policisë së Kosovës.
Në Kosovë është thënë se ai kishte organizuar “sulmin terrorist” ndaj zyrave të Komisionit Qendror të Zgjedhjeve në veri më 6 dhjetor.
Që nga 6 dhjetori, në katër komunat në veri të Kosovës – Mitrovicë të Veriut, Zveçan, Leposaviq dhe Zubin Potok – janë shënuar disa incidente të armatosura.
Sulme ka pasur edhe ndaj Policisë së Kosovës. Më 8 dhjetor, një polic u plagos lehtë, ndërkaq të shtunën, Policia tha se në tri raste ka pasur të shtëna drejt zyrtarëve policorë nga “grupet kriminale”, duke shtuar se policët janë kundërpërgjigjur me zjarr.
Për shkak të situatës në veri të Kosovës, presidentja e Kosovës, Vjosa Osmani, vendosi që të shtyjë zgjedhjet lokale në katër komunat veriore për prillin e vitit të ardhshëm.
Paraprakisht, zgjedhjet ishin caktuar që të mbaheshin më 18 dhjetor në Mitrovicë të Veriut, Zveçan, Zubin Potok dhe Leposaviq. Këto komuna, që nga nëntori kanë mbetur pa kryetarë, pas dorëheqjes së tyre.