Anësori i kombëtares së Kosovës, Edon Zhegrova, ka folur lidhur me përjashtimin nga grumbullimi i fundit me “Dardanët”.
Në një konferencë për media, ai ka thënë se vendimin për largimin e tij e ka marrë Federata e Futbollit të Kosovës (FFK), dhe jo përzgjedhësi Franco Foda.
“Po, me të vërtetë, diçka e vogël ndodhi me përzgjedhjen. Arrita vonë në një takim dhe ajo që më zemëroi pak më shumë ishte se ishte federata ajo që e mori vendimin dhe jo trajneri, por e di që jam profesionist. Tani, është në të kaluarën, çështja është zgjidhur dhe ne ecim përpara”, ka thënë futbollisti i Lille.
Megjithatë, lidhur me këtë çështje deklaratë shumë më ndryshe kishte dhënë kreu i FFK-së, Agim Ademi.
Gjatë një interviste për televizionin shqiptar “Top Channel”, Ademi kishte deklaruar se vendimin për përjashtimin e Zhegrovës, Arijanet Muric dhe Florent Muslijës e kishte marrë selektori Franco Foda.
“Pikë së pari duhet të respektohet rregullorja e cila u është komunikuar lojtarëve. Është shumë e rëndësishme për ekipin që ajo të respektohet. Përjashtimi i tyre ka qenë vendimi i trajnerit, pasi ata kanë dalë nga grumbullimi në orët e vona të natës”, kishte thënë ai më 10 shtator.
Në anën tjetër, në njoftimin e FFK-së ishte bërë e ditur se ka qenë vendim i përbashkët i trajnerit dhe Federatës.
“Me vendim të përbashkët të përzgjedhësit Franco Foda dhe Federatës, tre futbollistët: Arjanet Muric, Edon Zhegrova dhe Florent Muslija janë larguar nga grumbullimi i ekipit kombëtar, për shkak të thyerjes së rregullores së ekipit kombëtar të vendosur nga përzgjedhësi dhe Federata. Për masat e mëtejme ndaj futbollistëve në fjalë, do të vendoset nga Komiteti Ekzekutiv i FFK-së”, thuhej në komunikatën e 8 shtatorit.
Gjithashtu, Agim Ademi dyshohet se i kishte kërcënuar tre futbollistët e përjashtuar.
Për TV Dukagjinin kishte dhënë detaje kryeprokurori i Prishtinës, Zejnullah Gashi.
“E konfirmoj se është autorizuar Policia e Kosovës të verifikojë këto informata nëse ka të bëjë diçka me veprën penale “kanosje”. Pastaj, pasi të sigurohen informatat e Policisë do të vendosim nëse do të hapet rast për një vepër penale të tillë. Do t’i verifikojmë informatat e Policisë, nëse janë të vërteta do të fillojmë me hetimet”, kishte thënë Gashi.