Asociacioni i Gazetarëve të Kosovës (AGK), ka shprehur shqetësimin për vendimin e menaxhmentit të Radio Televizioni i Kosovës (RTK) për të mos vazhduar kontratat e punës për dy gazetaret, Hana Marteti dhe Edina Avdiu.
Në reagimin e saj, AGK vlerëson se mosvazhdimi i angazhimit të tyre lidhet drejtpërdrejt me punën profesionale të gazetareve dhe me, siç thuhet, mosgatishmërinë e tyre për t’iu nënshtruar presioneve apo për të bërë kompromise në raportim.
Sipas AGK-së, ndërprerja e kontratave pa një vlerësim të qartë të performancës bart të gjitha shenjat e një vendimi të planifikuar më herët dhe me karakter hakmarrës. Në reagim theksohet gjithashtu se menaxhmenti ka qenë në dijeni për shtatzëninë e njërës prej gazetareve, Edina Avdiu.
AGK e cilëson këtë si praktikë të dëmshme që minon besimin e publikut në transmetuesin publik dhe dëmton lirinë e medias.