Asociacioni i Gazetarëve të Kosovës (AGK) e ka quajtur shqetësues dhe dekurajues votimin e Luljeta Aliut për anëtare të Komisionit të Pavarur të Mediave (KPM).
AGK-ja në një komunikatë për media ka theksuar se votimi nga partia në pushtet i një avokateje publike të politikave të saj në Qeveri, shfaq hapur qëllimin e partisë në pushtet për t’i kontrolluar institucionet e pavarura mediale.
“Komisioni i Pavarur i Medieve duhet të ruajë pavarësinë politike dhe partiake, për të kryer në mënyrë të pandikuar punën për monitorimin dhe rregullimin e skenës audio-vizuale në Kosovë. Emërimi i zonjës Aliu shkon në kundërshtim me këtë përpjekje dhe mund t’i kontribuojë klimës antimedie që kjo Qeveri ka krijuar, në shumë raste në dy vitet e fundit”, thuhet tutje në njoftim.
Po ashtu, edhe Qendra Evropiane për Lirinë e Medias (ECMPF) janë shprehur të zhgënjyer nga vendimi i Kuvendit të Kosovës për zgjedhjen e Luljeta Aliu-Krasniqit si anëtare të Komisionit të Pavarur për Media (KPM).
Në reagimin e tyre thuhet se Aliu e ka përkrahur publikisht Lëvizjen Vetëvendosje dhe politikat e saj, si rrjedhojë, sipas tyre, ajo nuk mund të jetë e pavarur.
Tutje, aty thuhet se ECPMF do të nisë menjëherë dialogun me Këshillin e Europës dhe PACE për t’u informuar rreth këtij zhvillimi, sipas tyre, shqetësues që do të ketë ndikim të madh në pavarësinë e KPM-së.