Asociacioni i Komunave të Kosovës ka kërkuar nga niveli qendror t’i rregullojë uebfaqet komunale, që sipas tyre ka një kohë që nuk janë duke funksionuar si duhet.
Sipas AKK-së, këto probleme po ndodhin për shkak të problemeve me serverat me anë të të cilëve mirëmbahen uebfaqet e komunave.
“Sipas zyrtarëve komunalë, kjo po ndodh kryesisht për shkak të problemeve apo ngarkesave në serverat që mirëmbahen uebfaqet e komunave dhe të problemeve të natyrës së tillë, ndoshta edhe teknike, në nivelin qendror”, thuhet në njoftim.
Në reagimin e AKK-së, thuhet edhe se funksionimi jo i mirë i uebfaqeve të komunave, ndikon edhe në procesin e vlerësimit të transparencës, sepse sipas tyre publikimi i dokumenteve të nevojshme është shumë i vështirë.
“Kjo gjë ndëshkon Komunat, sidomos gjatë procesit të vlerësimit të transparencës, gjatë vlerësimit të performancës komunale, në procesin e publikimit të dokumenteve për konsultimet me publikun, sepse dihet që shumica e dokumenteve kanë afat kohor të caktuar të publikimit. Dhe këto ndëshkime pastaj bëhen tërësisht pa fajin e Komunave dhe Zyrtarëve të ngarkuar për këto çështje”, thuhet në njoftimin e AKK-së.
Këto shqetësime, sipas AKK-së, janë ngritur nga Kolegjiumi për Komunikim me Publikun, drejtorët komunalë për administratë dhe Kolegjiumin e Zyrtarëve Komunale të IT-ve, por sipas tyre nuk ka pasur zgjidhje të problemit.