Pesë persona janë lënduar si pasojë e një aksidenti që ka ndodhur të premten në Veternik të Prishtinës.

Lajmin për Dukagjinin e ka konfirmuar, zëdhënësja e Policisë së Kosovës për rajonin e Prishtinës, Flora Ahmeti.

Sipas saj, në aksident janë përfshirë dy automjete.

“Rreth orës 10:00 kemi pranuar informatën se në rrugën  Prishtinë- Ferizaj, ka ndodhur një aksident trafiku me lëndime. Në këtë aksident kanë qenë të përfshira dy automjete në lëvizje. Si pasojë e aksidentit lëndime trupore kanë pësuar pesë persona. Personat e lënduar janë dërguar për trajtim mjekësor. Me rastin po merret njësiti i trafikut”, ka thënë ajo.