Shtatë persona kanë pësuar lëndime si pasojë e një aksidenti të ndodhur të dielën e dy tetorit në magjistralen Prishtinë-Pejë.

Në aksidentin e ndodhur konkretisht në fshatin Arllat, janë përfshirë dy vetura.

Kështu ka bërë të ditur për Portalin Dukagjini, zëdhënësi i Policisë së Kosovës, Baki Kelani.

“Rreth orës 14:00, në Arllat ka ndodhur një aksident trafiku, ku janë përfshirë dy vetura. Në këtë aksident kanë pësuar lëndime të lehta shtatë persona”, ka thënë Kelani.

Sipas tij, njësitet relevante nga Policia e Kosovës janë marrë me rastin.

Ndryshe, në raportin 24-orësh të policisë thuhet se ka ndodhur një aksident me fatalitet, 19 aksidente trafiku me të lënduar dhe 50 të tjera me dëme materiale.

Gjatë këtij 24-orëshi, janë gjithsej një mijë e 558 tiketa trafiku të shqiptuara nga policia.