Dy persona janë lënduar si pasojë e një aksidenti mes një kamioni, një veture zyrtare dhe një furgoni, në autostradën “Ibrahim Rugova”, në hyrje-dalje në Mazgit.
Lajmin për Portali Dukagjini e ka konfirmuar zëdhënësi për Policinë e Kosovës, Daut Hoxha, i cili ka thënë se personat e lënduar janë dërguar për tretman mjekësor.
“Ju informoj se me datën 11.07.2023 rreth orës 06:00, është raportuar se në autostradën ‘Ibrahim Rugova’ në hyrje – dalje në Mazgit është shkaktuar një aksident trafiku ku janë përfshirë: Një automjet zyrtar, një kamion dhe një mjet furgon (kombi) dhe si pasojë e aksidentit përveç dëmeve materiale lëndime trupore kanë pësuar dy persona të cilët janë dërguar për trajtim mjekësorë”, ka thënë Hoxha.
Sipas tij, rastit i janë përgjigjur njësitet relevante policore për menaxhim trafiku në autostradë, ekipe tjera dhe autoambulanca.
Ai ka thënë se prokurori dhe autoritetet tjera janë njoftuar për rastin dhe pas kryerjes së procedurave të vend shikimit rruga është liruar pas ndërprerjes së përkohshme të qarkullimit të trafikut.