Drejtoria për Hetimin e Krimeve Ekonomike dhe Korrupsionit, përkatësisht Njësia Rajonale në Ferizaj, ka zhvilluar një aksion kundër shmangies së tatimit, ekonomisë joformale dhe shkeljeve të tjera ligjore në marrëdhëniet e punës.
Sipas raportit 24-orësh të Policisë së Kosovës, aksioni është realizuar më 28 korrik, me autorizim të Prokurorisë Themelore në Ferizaj dhe në bashkëpunim me institucionet e tjera ligjzbatuese.
Gjatë kontrolleve të zhvilluara në 32 auto-parkingje në qytetin e Ferizajt, autoritetet kanë evidentuar shkelje të ndryshme të kryera nga pronarët e bizneseve.
Për të gjitha parregullsitë e konstatuara, inspektorët kanë përpiluar procesverbale, ndërsa autoritetet kanë bërë të ditur se ndaj rasteve të evidentuara do të ndërmerren veprimet procedurale në përputhje me kompetencat ligjore.