Prokuroria Speciale e Kosovës ka ngritur aktakuzë kundër 35 zyrtarëve policorë nën dyshimet se kanë marrë ryshfet.
12 policëve dhe dy doganierëve u është ngritur aktakuzë për pikën kufitare “Qafë Prush”.
“Prokuroria Speciale e Republikës së Kosovës (PSRK) ka ngritur aktakuzë në Gjykatën Themelore në Prishtinë – Departamentin Special, kundër dymbëdhjetë (12) zyrtarëve policorë të Stacionit Policor për Mbikëqyrje të Kufirit ‘Qafë Prush’, dhe kundër dy (2) zyrtarëve doganorë, në kuadër të Drejtorisë Rajonale të Policisë Kufitare, për shkak të dyshimit të bazuar mirë se e kanë kryer veprën penale ‘Marrja e ryshfetit’ e sanksionuar me nenin 421 të Kodit Penal”, thuhet në njoftim.
Kurse, për pikën kufitare “Qafë Morinë” u është ngritur aktakuzë 23 policëve.
“Prishtinë, 26 dhjetor 2023 – Prokuroria Speciale e Republikës së Kosovës (PSRK) ka ngritur aktakuzë në Gjykatën Themelore në Prishtinë – Departamentin Special, kundër njëzet e tre (23) zyrtarëve policorë të Stacionit Policor për Mbikëqyrje të Kufirit ‘Qafë Morinë’, në kuadër të Drejtorisë Rajonale të Policisë Kufitare, për shkak të dyshimit të bazuar mirë se e kanë kryer veprën penale ‘Marrja e ryshfetit’, e sanksionuar me nenin 421 të Kodit Penal dhe ‘Keqpërdorim i pozitës apo autoritetit zyrtar’ e sanksionuar me nenin 414 të Kodit Penal”, thuhet në njoftim.
Sipas njoftimit të Prokurorisë, të dyshuarit nën cilësinë e zyrtarëve kanë marrë ryshfet nga disa persona nënshtetas të Shqipërisë dhe Kosovës, ku kanë lejuar hyrjen e disa personave pa i verifikuar e kontrolluar.
“Prokurori Speciale njofton se të akuzuarit në cilësinë e personave zyrtarë kanë marrë ryshfet nga qytetarët e Republikës së Shqipërisë dhe Republikës së Kosovës, me rastin e kalimit në pikat kufitare ‘Qafë Prush’, me ç‘rast kanë lejuar hyrjen e personave në territorin e Kosovës, pa i verifikuar dhe pa i kontrolluar nëse i plotësojnë kushtet ligjore për hyrje dhe dalje nga territori i Republikës së Kosovës, sipas legjislacionit në fuqi”, thuhet në njoftim.