Prokuroria Themelore në Mitrovicë ka ngritur aktakuzë ndaj dy personave, A.A. dhe A.A., për dy vepra penale: “Ndërtimi pa leje” dhe “Shkaktimi i rrezikut të përgjithshëm”.

Sipas aktakuzës, të pandehurit gjatë periudhës 20 korrik – 11 gusht 2023, në Skenderaj, kryen punë ndërtimore pa leje, në kundërshtim me ligjin.

Po ashtu, ata akuzohen se nuk kanë marrë masat e duhura të sigurisë gjatë punimeve, duke shkaktuar rrëshqitje të masive të dheut, dhjetë metra nën nivelin e asfaltit.

Si pasojë, janë shkaktuar dëme në pronën publike përgjatë dy rrugëve, murin dhe rrethojën e çerdhes në ndërtim, si dhe dëme të konsiderueshme në pronat private të qytetarëve F.S. dhe D. Xh.

“Të pandehurit A.A., dhe A.A., akuzohen se në bashkëkryerje dhe me dashje, në kundërshtim me detyrimet e përcaktuara me ligj  nuk i vendosin  pajisjet  për mbrojtje ashtu që gjatë mihjes së dheut dhjetë (10) metra nën nivelin e asfaltit ka ardhur deri te rrëshqitja masive e dheut, ku si pasojë e kësaj përpos dëmeve të shkaktuara në pronën publike përgjatë dy rrugëve  si dhe murit e rrethojës së  çerdhes së fëmijëve në ndërtim e sipër,  po ashtu janë shkaktuar dëme të konsiderueshme edhe  në pronat private të të dëmtuarve F.S., dhe D. Xh.”, thuhet në njoftim.

Prokuroria ka kërkuar nga Gjykata Themelore në Mitrovicë – Dega Skenderaj, që të pandehurit të shpallen fajtorë dhe t’u shqiptohet dënimi i paraparë me Kodin Penal të Republikës së Kosovës.