Prokuroria Speciale e Republikës së Kosovës ka ngritur aktakuzë ndaj tre personave për krime lufte kundër popullsisë civile gjatë periudhës së luftës së Kosovës.

Aktakuza është ngritur ndaj R.V. dhe M.V., të nacionalitetit serb, dhe A.Ç., të nacionalitetit boshnjak, për veprën penale “Krimi i luftës kundër popullsisë civile”.

“Prokuroria Speciale e Republikës së Kosovës ka ngritur aktakuzë ndaj të pandehurve R.V. dhe M.V. të nacionalitetit serb, dhe A.Ç. të nacionalitet boshnjak, për shkak të dyshimit të bazuar se e kanë kryer veprën penale” “Krimi i luftës kundër popullsisë civile”, e sanksionuar me nenin 142 lidhur me nenin 22 të Ligjit Penal të Republikës Socialiste Federative të Jugosllavisë ( tutje “LP-RSFJ”) si ligj në fuqi në kohën e kryerjes së veprës penale”, thuhet në njoftim.

Hetimet kanë zbuluar se të pandehurit, si pjesëtarë të rezervë të policisë, kanë bashkëpunuar me forcat policore serbe për të kryer vrasje, dëbim, shkatërrim të pasurisë dhe keqtrajtime ndaj popullsisë civile shqiptare në fshatin Ozdrim, Komuna e Pejës, dhe fshatrat përreth gjatë periudhës së luftës.

Si pasojë e këtyre krimeve, janë vrarë 14 civilë të nacionalitetit shqiptar.

“Hetimet kanë vërtetuar se të pandehurit si pjesëtarë rezervë të Policisë të Stacionit Policor në Pejë, në bashkëkryerje me pjesëtarë të forcave policore serbe, gjatë kohës së luftës në Kosovë, në fshatin Ozdrim, Komuna e Pejës dhe në fshatrat përreth regjionit të Pejës, kanë kryer vrasje, dëbim, shkatërrim të pasurisë dhe keqtrajtim ndaj popullsisë civile shqiptare që nuk ishin të përfshirë në luftë, me ç ‘rast u vranë (14) civil të nacionalitet shqiptar.

Prokuroria ka propozuar mbajtjen e gjykimit në mungesë, konform dispozitave të KPPK-së, për shkak se të pandehurit gjenden në arrati.

Prokuroria Speciale mbetet e përkushtuar në ndjekjen dhe sjelljen para drejtësisë të të gjithë personave përgjegjës për krimet e luftës në Kosovë”, thuhet më tej në njoftim e prokurorisë.