Prokuroria Themelore në Mitrovicë ka ngritur aktakuzë në Gjykatën Themelore në Mitrovicë ndaj mjekut A.V. nga Vushtrria, nën dyshimin për kryerjen e veprës penale “keqpërdorim i pozitës apo autoritetit zyrtar”.
Sipas aktakuzës, i pandehuri dyshohet se në periudhën nga 20 korriku deri më 28 tetor 2025, në Qendrën e Mjekësisë Familjare në Vushtrri, në cilësinë e specialistit të mjekësisë familjare, ka lëshuar raporte mjekësore të rreme për pacientë që nuk vuanin nga sëmundjet e shënuara në to.
Prokuroria bën të ditur se mjeku, me qëllim përfitimi material, i ka pyetur pacientët se çfarë diagnoze dëshironin t’u shënohej, në mënyrë që raportet të përdoreshin për hapjen e pushimeve mjekësore, në kundërshtim me Ligjin e Punës.
Po ashtu, ai dyshohet se ka përshkruar barna sipas rekomandimeve të agjentëve farmaceutikë dhe pas lëshimit të raporteve mjekësore ka pranuar para në vlerë nga 5 deri në 50 euro për secilin rast.
Me ngritjen e aktakuzës, Prokuroria i ka propozuar gjykatës që i pandehuri të shpallet fajtor dhe t’i shqiptohet sanksioni penal i paraparë me Kodin Penal të Republikës së Kosovës.