Prokuroria Speciale e Kosovës, ka bërë të ditur se është ngritur aktakuzë në Gjykatën Themelore në Prishtinë – Departamentin Special, në lidhje me një rast të dhunimit seksual gjatë luftës në Kosovë.
Aktakuza është ngritur për dy të pandehur me inicialet I.R dhe D.D., të cilët po gjykohen në mungesë për këtë çështje.
Sipas Prokurorisë Speciale, të pandehurit I.R. dhe D.D., të cilët ishin pjesëtarë të forcave policore të Ministrisë së Punëve të Brendshme të Serbisë, akuzohen për kryerjen e dhunimit seksual.
Ky akt konsiderohet të jetë pjesë e një sulmi të gjerë dhe sistematik nga forcat ushtarake, policore dhe paramilitare serbe kundër popullatës civile shqiptare në territorin e komunës së Prishtinës.
“Prokuroria Speciale njofton se të pandehurit me iniciale I.R. dhe D.D. si pjesëtarë të forcave policore të Ministrisë së Punëve të Brendshme të Serbisë, në kundërshtim me rregullat e të drejtës ndërkombëtare humanitare, gjatë një sulmi të gjerë dhe sistematik nga forcat ushtarake, policore dhe paramilitare serbe, kundër popullatës civile shqiptare në territorin e komunës së Prishtinës, duke ditur për ekzistimin e një sulmi të tillë, me përdorimin e dhunës dhe veprimeve të tjera çnjerëzore, kanë kryer dhunim seksual ndaj gruas së nacionalitetit shqiptarë”, thuhet në njoftim.
Viktima ka pësuar lëndime të rënda fizike në trup dhe është prekur nga trauma psikike e përhershme.
Të pandehurit akuzohen për kryerjen e veprës penale “Krimet e luftës kundër popullsisë civile” në përputhje me neni 142 të Kodit penal të Jugosllavisë (i cili ishte në fuqi në kohën e kryerjes së veprës penale). Tani ky veprim konsiderohet si një krim kundër njerëzimit, sipas neni 143 paragrafi 1 nën paragrafi 1.7 të Kodit Penal të Republikës së Kosovës.
Prokuroria Speciale ka propozuar që gjykimi të mbahet në mungesë, pasi janë bërë të gjitha përpjekjet ligjore për të gjetur të pandehurit.