Presidentja e Komisionit Evropian, Ursula von der Leyen, tha se akuzat për korrupsion kundër katër personave ishin “shqetësuese”.
Në mesin e të arrestuarve ishte edhe zëvendëspresidentja e Parlamentit Evropian, Eva Kaili, që besohet të jetë një nga të akuzuarit, shkruan BBC.
Prokurorët dyshojnë se një shtet i Gjirit – thuhet se Katari – u përpoq të ndikojë në parlament duke dhuruar para ose dhurata.
Katari ka mohuar sjelljen e pahijshme.
Policia belge sekuestroi para me vlerë rreth 600,000 euro (632,000 dollarë; 515,000 £) në 16 kontrolle në Bruksel, të premten. Gjithashtu janë marrë kompjuterë dhe telefona celularë për ta ekzaminuar përmbajtjen e tyre.
Katër persona janë akuzuar, ndërsa dy janë liruar, thanë prokurorët të dielën.
Asnjë i dyshuar nuk është përmendur publikisht, por zonja Kaili mësohet të jetë në mesin e atyre që janë paditur.
“Ata akuzohen për pjesëmarrje në një organizatë kriminale, pastrim parash dhe korrupsion”, tha në një deklaratë zyra e prokurorisë federale belge.
Gjithashtu edhe shefi i politikës së jashtme të BE-së, Josep Borrell, i përshkroi zhvillimet e fundit si “shumë shqetësuese”, teksa mbërriti të hënën në një takim të ministrave të jashtëm të BE-së në Bruksel.
“Një hetim është duke u zhvilluar dhe ne po e ndjekim atë”, tha ai. “Këto janë akuza shumë të rënda”.
Ministrja e Jashtme gjermane, Annalena Baerbock, tha se në këtë rast duhej të zbatohej “fuqia e plotë e ligjit”. “Kjo ka të bëjë me besueshmërinë e Evropës, kështu që kjo duhet të shkaktojë pasoja në fusha të ndryshme,” tha ajo.
“Ky është një skandal që ne duhet ta arrijmë në fund, në mënyrë që të sigurohemi që të mos ndodhë më”, tha ministri i Jashtëm irlandez, Simon Coveney, duke bërë thirrje për një “hetim të plotë dhe transparent”.