Politikani shqiptar nga radhët e CDU-së në Parlamentin e Hamburgut të Gjermanisë, Muhamet Idrizi, ka ngritur shqetësime lidhur me sigurinë e fletëvotimeve të diasporës për zgjedhjet e 7 qershorit në Kosova.
Përmes një postimi në Facebook me video, Idrizi ka alarmuar se dokumentet zgjedhore të dërguara për votuesit jashtë vendit nuk posedojnë shirit sigurie, duke vënë në pikëpyetje integritetin dhe gjurmueshmërinë e materialeve zgjedhore.
Sipas tij, mungesa e elementeve të qarta të sigurisë mund të ndikojë në besimin e qytetarëve ndaj procesit zgjedhor, veçanërisht në votimin e diasporës.
“Në dokumentet e deritanishme të dërguara për diasporën mungon, sipas mendimit tonë, një vulë e qartë sigurie dhe kontrolli që garanton integritetin dhe gjurmueshmërinë e materialeve zgjedhore. Sidomos në zgjedhjet jashtë vendit, masat transparente të sigurisë janë thelbësore për të forcuar besimin në procesin demokratik”, ka shkruar Idrizi.
Ai me video e ka shpërfaqur dergesen postare me fletvotim ku dëshmohet mungesa e këtyre masave të sigurisë së fletvotimit.