Carlos Alcaraz ka fituar një finale dramatike në Australian Open, duke u bërë tenisti më i ri në histori që kompleton Career Grand Slam, ndërsa i dha fund përpjekjes së Novak Djokovicit për ta fituar titullin e 25-të të madh në karrierë.
22-vjeçari spanjoll u rrëzua në fushë nga emocioni pas fitores 2-6, 6-2, 6-3, 7-5 në Melburn. Menjëherë pas ndeshjes, Djokovic tregoi sportivitet të madh duke kaluar rrjetën për ta përgëzuar Alcarazin për këtë arritje historike.
Pavarësisht humbjes, serbi 38-vjeçar la të hapur mundësinë se kjo mund të ketë qenë paraqitja e tij e fundit në Australian Open.
“Nuk e kam menduar se do të qëndroja sërish në ceremoninë përmbyllëse të një Grand Slami,” tha Djokovic para publikut. “Askush nuk e di çfarë sjell e nesërmja, e lëre më gjashtë apo dymbëdhjetë muajt e ardhshëm, por ka qenë një udhëtim i jashtëzakonshëm.”
Djokovic e nisi ndeshjen më mirë, duke dominuar setin e parë falë përvojës së tij, por Alcaraz gjeti ritmin nga baza e fushës dhe gradualisht mori kontrollin e finales.
Me këtë fitore, Alcaraz ka tashmë shtatë tituj Grand Slam dhe bëhet vetëm tenisti i nëntë në histori që fiton të katër turnetë e mëdhenj: Australian Open, Roland Garros, Wimbledon dhe US Open. Ai është i pari që e arrin këtë që nga Djokovic në vitin 2016.
Triumfi i Alcarazit do të thotë se Djokovic mbetet ende i barabartë me legjenden australiane Margaret Court me nga 24 tituj Grand Slam në konkurrencën individuale. Court ishte e pranishme në Rod Laver Arena për ta ndjekur finalen.
Në dy sezonet e fundit, Alcaraz dhe italiani Jannik Sinner janë shndërruar në forcat dominuese të tenisit botëror, duke fituar së bashku nëntë titujt e fundit Grand Slam. Fitorja e parë e Alcarazit në Melburn vetëm sa e forcon këtë dominim.