Aleanca hedh thëngjill para Qeverisë, Ramadani: Kosova nga terri energjetik po kalon në terr politik

Burim Ramadani, nga Aleanca  ka kritikuar qeverisjen e Albin Kurtit dhe Lëvizjes Vetëvendosje, duke thënë se Kosova po kalon nga “terri energjetik” në “terr politik”.

Në një konferencë për media para aksionit të Aleancës, Ramadani tha se koha ka ecur dhe se institucionet e vendit po përballen me bllokim.

“Mesazhi i AAK-së me oren 11″55, është që koha ka ecur dhe koha po shkon. Në emër të Aleancës, përmes jush, ta dërgojmë mesazhin se me Kurtin dhe Vetëvendosjen, gjatë këtyre 6-7 viteve të fundit, Kosova nga një terr energjetik po kalon në terr politik”, tha Ramadani.

Ai foli edhe për sektorin energjetik dhe nevojën për ndërtimin e një termocentrali të ri, duke kritikuar mungesën e përgjegjësisë për problemet në këtë sektor.

Ramadani e lidhi “terrin politik” me bllokimin e institucioneve dhe pamundësimin e krijimit të tyre.

“Sot kanë kaluar në fazën tjetër, që është terr politik. Terri politik është bllokimi i institucioneve, pamundësimi i krijimit të institucioneve”, deklaroi ai.

“Mesazhi dhe simbolika e thëngjillit, e qymyrit të Kosovës, është se Kosova edhe më tutje po fle mbi qymyr, por rryma nuk prodhohet”, tha Ramadani.

Sipas tij, një prej pikave kryesore të ofertës gjashtëpikëshe të Aleancës është ndërtimi i një termocentrali të ri në Kosovë.

Ramadani pretendoi gjithashtu se gjatë këtyre viteve rreth një miliard euro janë shpenzuar për blerjen e energjisë elektrike nga Serbia dhe vende të tjera, duke thënë se nga kjo situatë, sipas tij, ka përfituar “mafia energjetike”.

“Dhe është e qartë që gjatë këtyre viteve, rreth 1 miliard euro janë blerë rrymë në Serbi e vende të tjera, e prej kësaj ka përfituar askush tjetër përpos mafias energjetike. Në kohët e fundit po shohim se punëtorët të cilët e humbin jetën bashkë duke e nxjerrë këtë qymyr për popullin e Kosovës, dhe nuk ka përgjegjësi as politike, as menaxheriale”, tha ai.