“Në këto çaste vendimtare për ardhmërinë e vendit, po ju shkruaj nga Kuvendi i Republikës së Maqedonisë së Veriut, ku bashkë me kolegët deputetë kemi mbi supe përgjegjësinë madhore për të vendosur se a do të vazhdojë apo jo vendi ynë hapërimin drejt rrugës së integrimit”, ka shkruar kryetari i Bashkimit Demokratik për Integrim (BDI), Ali Ahmeti, në faqen e tij në Facebook.
Ky deklarim i Ahmetit erdhi pas një propozimi francez, i cili synon të ndihmojë në tejkalimin e dallimeve mes Shkupit dhe Sofjes.
Ky propozim është pasuar me protesta në kryeqytetin e Maqedonisë së Veriut.
Ai ka thënë se deklarimet e kryetares së Komisionit Evropian, Ursula von der Leyen, ishin të qarta, që tregojnë për përkrahjen e shteteve të Evropës që i japin Maqedonisë së veriut.
“Të qarta dhe shumë decide ishin sot deklarimet e kryetares së Komisionit Evropian, znj. Ursula von der Leyen për përkrahjen që na japin të gjitha shtetet e Evropës, për përmbajtjen e propozimit të presidencës franceze që nuk cenon në asnjë mënyrë tiparet e identitetit gjuhësor, kulturor dhe historik të bashkëqytetarëve tanë maqedonas”, ka shkruar Ahmeti.
Ahmeti ka thënë se vendimet që kanë marrë më herët u dëshmuan të dobishme, prandaj sipas tij, edhe këto ditë duhet të reflektojë Kuvendi i Maqedonisë së Veriut, për të ardhmen Evropiane.
“Bashkë kemi ndërmarrë vendime të rëndësishme që u dëshmuan të dobishme për të gjithë ne, prandaj këto ditë le të reflektojmë thellë dhe le të vulosim ardhmërinë tonë evropiane. EVROPA NA PRET!”, ka përfundua Ali Ahmeti.