Ambasada Amerikane në Kosovë njoftoi se e ngarkuara me punë, Anu Prattpati, mori pjesë sot në ceremoninë e përkujtimit të sulmeve terroriste të 11 shtatorit në Shtetet e Bashkuara të Amerikës.
Në një postim në rrjetin social “Facebook”, Ambasada theksoi mirënjohjen e thellë ndaj popullit kosovar për mbështetjen e tij të vazhdueshme në luftën kundër terrorizmit dhe mbrojtjen e demokracisë.
“Sot, e ngarkuara me punë, Anu Prattpati iu bashkua ceremonisë së përkujtimit në 23 vjetorin e sulmeve terroriste të 11 shtatorit. I jemi thellësisht mirënjohës popullit kosovar dhe partnerëve në mbarë botën që kanë qëndruar me ne në luftën kundër terrorizmit, në mbrojtje të demokracisë dhe në ndjekje të një bote të drejtë dhe paqësorë. Nuk do të harrojmë kurrë”, thuhet në njoftim.
Prattpati së bashku me kryeministrin, Albin Kurti, mori pjesë në ceremoninë përkujtimore që u zhvillua pranë pllakës memoriale që ndodhet në oborrin e Qeverisë së Kosovës, e cila u vendos në vitin 2019 për të nderuar kujtimin e afër 3,000 viktimave të asaj dite tragjike.