Ambasada e Republikës së Kosovës në Shkup ka reaguar pas thirrjeve raciste dhe antishqiptare që u dëgjuan gjatë një ndeshjeje basketbolli në Kumanovë, ku u brohoritën slogane si “vdekje për shqiptarët” dhe “dhoma gazi për shqiptarët”.
Në reagimin zyrtar, ambasada thotë se ka përcjellë me vëmendje zhvillimet që ndërlidhen me këtë ngjarje dhe dënon fuqishëm mesazhet e urrejtjes të dëgjuara në palestër.
“Duke pasur parasysh që thirrjet e tifo grupeve të tilla janë të shpeshta dhe rëndom mbretërojnë nëpër stadiume, ne dënojmë në termat më të fuqishëm këto thirrje”, thuhet në reagim.
Ambasada ka vlerësuar reagimin institucional të autoriteteve të Maqedonisë së Veriut, si dhe qëndrimin e qartë të përfaqësuesve shqiptarë në Qeveri, që kërkuan veprim të menjëhershëm ndaj autorëve të thirrjeve ksenofobe.
“Mjaft premtues është aktivizimi i prokurorisë dhe urojmë që autorët të i nënshtrohen pasojave juridike, duke krijuar kësisoji një trend të ndëshkueshmërisë për rastet e tilla”, thuhet më tej në reagimin e Ambasadës së Kosovës.