Letra e dërguar nga përfaqësuesit parlamentarë të disa vendeve evropaine tek diplomacitë perëndimore e në të cilën kërkohet një distancim ndaj Serbisë është mirëpritur edhe nga ana e Ambasadorit të Kosovës në Gjermani, Faruk Ajeti.
Me anë të një postimi në Facebook, ky i fundit vlerëson se letra është dërguar në një momentum të duhur. Siç njofton ai, në letër shprehet qartazi një kërkesë për mospërdorimin e një politike zemërgjerë ndaj Serbisë dhe njohjen e Kosovës si një vend sovran me demokraci funksionale.
“Në këtë iniciativë të përbashkët drejtuar komunitetit ndërkombëtar, ata kërkojnë të nxirren mësimet nga e kaluara dhe mos të ndjek një politikë me Beogradin në qendër të Ballkan-it, ku Serbia duhet të shihet si përgjegjëse për përshkallëzimin e situatës në veri të Kosovës dhe mos të ndiqet një politikë me zemërgjerësi ndaj Beogradit, e cila ka dëshmuar që nuk po funksionon. “Kosova është një vend sovran dhe një demokraci funksionale. Ky fakt duhet të përbëjë bazën e politikës sonë të përbashkët ndaj krizës aktuale”, thuhet në njoftim.
Siç raporton Tagesspiegel, politikanët e huaj kanë kërkuar nga BE-ja e SHBA-ja më shumë distancë nga Serbia dhe të merren më në mënyrë kritike me presidentin serb, Aleksandër Vuçiq.