Jehona Lushtaku-Sadriu, kryetare e forumit të gruas në Lidhjen Demokratike të Kosovës (LDK), së fundi ka kërkuar dorëheqjen e ministres së Punëve të Jashtme, Donika Gërvalla.
Përmes një postimi në faqen e saj zyrtare në Facebook, Lushtaku i cilëson deklarimet e Gërvallës si deklarime skandaloze.
“Ministrja e Kurtit, Znj. Gërvalla-Schëarz, DORËHIQU! Ministrja Donika Gërvalla-Schwarz paska vazhduar t’i mbrojë deklarimet e saja skandaloze, prapë duke hedhur dyshimet e saj në rolin e BE-së për sigurinë në Ballkanin Perëndimor”, ka shkruar Lushtaku.
Lushtaku thekson se veprimet e Gërvallës janë veprime të pamençura, veprime të cilat po i shkaktojnë dëme të pariparueshme Kosovës.
Kjo kërkesë e saj vjen pas deklaratës së ministres Gërvalla, e cila e quajti “Tigër prej letre”, Bashkimin Evropian.
Javën e kaluar kryetari I LDK-së, Lumir Abdixhiku, ka mbajtur një takim të mbyllur me gazetarë e opinionistë nga vendi ku temë diskutimi ka qenë gjendja politike në vend.