Me rezultat të ngushtë dy me një, kombëtarja angleze ka mposhtur atë zvicerane në sfidën miqësore të së shtunës.
Te Zvicra, nga minuta e parë janë aktivizuar, Granit Xhaka dhe Xherdan Shaqiri, kurse Andi Zeqiri ishte në bankën rezervë.
Golin e parë e shënuan zviceranët, në minutën e 22-të. Pas një harkimi të sulmuesit me prejardhje shqiptare Xherdan Shaqiri, shënoi Breel Embolo, kështu duke e kaluar Zvicrën në epërsi.
Në minutat shtesë të pjesës së parë, Anglia arriti ta barazojë rezultatin me golin e lojtarit të Manchester United, Luke Shaw.
Me këtë rezultat, të dyja kombëtaret shkuan në pushim.
Në pjesën e dytë loja ishte e balancuar, me të dyja ekipet që herë pas here sulmonin.
Por në minutën e 78-të, anglezëve iu akordua një penallti, të cilën e konkretizoi në gol, sulmuesi Harry Kane.
Goli i Kane ishte edhe goli vendimtar për fitoren e Anglisë.
Xherdan Shaqiri luajti për 80 minuta te Zvicra, ndërsa Granit Xhaka kompletoi ndeshjen. E Andi Zeqiri u inkuadrua në lojë në minutën e 62-të.
Zvicra, pas dy ditësh, do të luajë me Kosovën në Cyrih në kuadër të ndeshjeve miqësore.