Anulohen gjashtë seanca në vetëm një ditë si shkak i mungesës së gjyqtarëve dhe prokurorëve serbë

Janë anuluar gjashtë seanca të parapara të mbahen këtë të martë, si shkak i mungesës së gjyqtarëve dhe prokurorëve serbë, pasi ata kanë dhënë dorëheqje të hënën nga pozita e tyre

Gjykata Themelore në Mitrovicë





Për shkak të mungesës së gjyqtarëve dhe prokurorëve serbë, në Gjykatën Themelore në Mitrovicë të martën janë anuluar gjashtë seanca, të cilat kanë qenë të caktuara të mbahen këtë ditë në Departamentin për Krime të Rënda dhe Departamentin e Përgjithshëm – Divizionin Penal.

Këtë e ka bërë të ditur “Betimi për Drejtësi”, ndërsa arsyeja e mosmbajtjes është dorëheqja e gjyqtarëve dhe stafit administrativ serbë të hënën nga pozita në Gjykatën Themelore në Mitrovicë.

Ndryshe, vazhdimi i shqyrtimit gjyqësor i paraparë të mbahet këtë të marte, në rastin ku i akuzuari D.L. po akuzohet për veprën penale “Shtytje në vrasje të rëndë”, është anuluar për shkak të mungesës së gjyqtarit të rastit, Radosllav Markoviq.

Ndërsa, edhe gjyqtarët Veljko Vuqetiq, Dragica Jakovljeviq dhe Dragana Nikoliq kishin caktuar seanca gjyqësore për ditën e martë, por të njëjtat janë anuluar për shkak të mungesës së tyre.

Gjithashtu, gjyqtari Mentor Hajraj ka anuluar një rast “Vrasje në tentativë”, pasi në përbërjen e trupit gjykues ka munguar gjyqtari nga komuniteti serb, Zoran Paviq.

Gjyqtari Hajraj ka thënë se të gjitha palët janë njoftuar paraprakisht për shterjen e seancës të së martës.

Po ashtu, edhe gjyqtari Gëzim Ademi në Departamentin e Përgjithshëm – Divizionin Penal, ka shtyrë seancën e paraparë për të martën për shkak të mungesës së prokurores nga komuniteti serb, si dhe për shkak të mungesës së të akuzuarit.

Zyrtari për informim në Prokurorinë Themelore në Mitrovicë, Valon Preteni, ka thënë se prokurorët serbë të kësaj prokurorie i kanë dorëzuar dorëheqjet përmes email-it në Këshillin Prokurorial të Kosovës, ndërsa stafi administrativ serbë dorëheqjet i kanë dorëzuar në administratën e prokurorisë.

Ndërsa, sipas Raportit Vjetor për vitin 2021 të Prokurorit të Shtetit, numri i prokurorëve të komunitetit serb është 14 apo shprehur në përqindje i bie diku 7.69 për qind. Ndërkaq, në Gjykatën Themelore në Mitrovicë janë rreth 19 gjyqtarë serbë.

Edhe dhjetë deputetët e Listës Serbe e kanë dorëzuar të hënën mandatin e tyre edhe formalisht në Kuvendin e Kosovës.

Ky largim i tyre ka ardhur pas vendimit të autoriteteve të Kosovës për suspendimin e drejtorit të Policisë së Kosovës për rajonin e veriut, Nenad Gjuriq, i cili ka refuzuar që të zbatojë vendimin e Qeverisë së Kosovës për riregjistrimin e makinave që kanë targa të lëshuara nga Serbia në RKS – Republika e Kosovës.





Shija e redaktorit

Vetëm në muajin shkurt mërgata ka dërguar 87.9 milionë euro

Banka Qendrore e Republikës së Kosovës, sipas kalendarit të publikimeve, ka prezantuar statistikat për institucionet e tjera financiare për muajin shkurt 2024, të remitancave...

Ndahen 8 milionë euro për 11 komuna

Ministri i Administrimit dhe Pushtetit Lokal(MAPL), Elbert Krasniqi, ka njoftuar se janë ndarë 8 milionë euro në 11 Komuna. Ministri Krasniqi, bashkë me kryetarët e...

Kosova një hap më afër anëtarësimit në Këshill të Evropës

Komiteti për Politikë dhe Demokraci i Këshillit të Evropës ka miratuar raportin e raportueses për Kosovën, Dora Bakoyannis, ku rekomandohet që shteti ka përmbushur...

Të fundit nga rubrika