Arabia Saudite dhe Kosova e kanë nënshkruar marrëveshje për heqjen reciproke të vizave për bartësit e pasaportave diplomatike dhe pasaportave zyrtare.
Sot në Riad, zëvendësministri i Punëve të Jashtme dhe Diasporës, Kreshnik Ahmeti, u prit nga zëvendësministri për Punë të Jashtme i Arabisë Saudite, Waleed Abdulkarim El Khereiji.
Sipas njoftimit, në këtë takim është diskutuar për bashkëpunimin ekonomik dhe për fusha të tjera me interes për Kosovën.
“Gjatë takimit me zëvendësministrin për Punë të Jashtme, z. El Khereiji, u bisedua për ngritjen e bashkëpunimit ekonomik, bashkëpunimin në fushën e mbrojtjes dhe kundër terrorizmit dhe për nisjen dhe finalizimin e marrëveshjeve në fushën e transportit, edukimit dhe sportit”, thuhet në njoftim.
Ahmeti ka kërkuar që qytetarët e Republikës së Kosovës të kenë procedura më të lehta për hyrje në Arabinë Saudite.