Ish-ambasadori i Kosovës në Shtetet e Bashkuara të Amerikës, Avni Arifi, vlerëson se Akti Kombëtar për Mbrojtje i Shteteve të Bashkuara të Amerikës i bërë publik sot e ku përmendet edhe Kosova është dokument jashtëzakonisht i rëndësishëm dhe strategjik që sipas tij nënvizon se SHBA-të janë mbrojtësit dhe partnerët e popullit të Kosovës.
Arifit, i ftuar në “FIVE” në Dukagjin, u shpreh se me këtë rast u dëshmua se Shtetet e Bashkuara të Amerikës nuk kanë qenë kurrë pro shkëmbimit të territoreve për çka u shpreh se propaganda e kryeministrit në detyrë, Albin Kurti, ka rënë poshtë.
“Ky dokument jashtëzakonisht i rëndësishëm për Kosovën, dokument strategjik nënvizon shumë çështje se Shtetet e Bashkuara të Amerikës vazhdojnë të jenë mbrojtësit e popullit të Kosovës dhe partnerët e popullit të Kosovës. Me këtë dokument presidenti Trump ka dëshmuar se kurrë nuk ka nejt me shpatë mbi hartën e Kosovës siç e pati akuzuar Kurti dhe kjo propagandë ka rënë poshtë. Pastaj, qëndrimi i Ramush Haradinaj për Kosovën në NATO nuk paska qenë slogan partie dhe as ëndërr e tij por vizion shtetëror në vijë me SHBA-të”, u shpreh Arifi.
Arifi, mes tjerash, u shpreh se sipas aktit, SHBA-ja duhet të vazhdojë mbështetjen e një marrëveshjeje gjithëpërfshirëse përfundimtare mes Kosovës dhe Serbisë dhe se integriteti territorial nuk do të preket.
“Marrëveshja e Ohrit po ekzistojka dhe këtë e ka bërë Kurti dhe për mendimin tim kjo marrëveshje është me e keqe se ajo e vitit 2013 dhe nuk po i lihet alternativ Kosovës që ta implementojë këtë marrëveshje dhe integriteti territorial i Kosovës po garantohet nga SHBA-ja”.
“Kurrë SHBA-të nuk kanë qenë në favor të shkëmbimit të territorit apo ndarjes së kufijve, ka pasur zyrtarë që kanë qenë të afërt me Trump, si shqiptari Bolton, që pati thënë se ;nëse Kosova e Serbia merren vesh pse ne duhet ti pengojmë’. Por, ajo që ka thënë Kurti ka rënë pasi SHBA-të kurrë s’kanë qenë pro ndarjes së kufijve. Me këtë i është dhënë një vulë dhe fund të gjithë atyre që janë pro shkëmbimit të territoreve – ky është interes strategjik pos Kosovës edhe i Shteteve të Bashkuara të Amerikës”, u shpreh Arifi.