Gjykata Themelore në Pejë ka refuzuar kërkesën e Prokurorisë Themelore në Pejë për caktimin e masës së paraburgimit, dhe ka caktuar masën e arrestit shtëpiak në kohëzgjatje prej 30 ditësh ndaj të pandehurit S.H, i dyshuar për rrahjen e koleges.
Përmes një komunikate për media, Gjykata ka njoftuar se gjatë periudhës së arrestit shtëpiak, i dyshuari nuk mund të largohet nga shtëpia e tij, përveç kur kjo është e domosdoshme për përmbushjen e nevojave jetësore dhe vetëm me lejen e gjykatës.
Në rast të shkeljes së kësaj mase, thuhet se gjykata mund të caktojë masën e paraburgimit.
Në njoftim e Policisë thuhet se të pandehurit iu caktua masa e arrestit shtëpiak, pasi që gjyqtari i procedurës paraprake ka konstatuar se pretendimet e prokurorit se ndaj të pandehurit duhet të caktohet masa e paraburgimit si masë më e rëndë izoluese për të penguar rrezikun e ndikimit të dëshmitarëve dhe rrezikun e përsëritjes së veprës penale.
Kjo pasi që thuhet se gjykata është e bindur se me masën e arrestit shtëpiak mund të arrihet pengimi i ndikimit në të dëmtuarën si dhe mund të pengohet rreziku i përsëritjes së veprës penale.
Kundër këtij vendimi, thuhet se pala e pakënaqur ka të drejtë ankese në Gjykatën e Apelit.
Më 16 maj, Inspektorati Policor i Kosovës kishte arrestuar zyrtarin policor S.H në Pejë, nën dyshimin se i njëjti ka kryer veprën penale ”Lëndim i rëndë trupor” dhe ”kanosje”, duke lënduar rëndë dhe kanosur kolegen e punës, me të cilën thuhet se ishte në një lidhje.