Dy persona janë arrestuar për vrasje të rëndë në tentativë që ka ndodhur të martën e kësaj jave në Drenas.
Sipas raportit 24-orësh të Policisë, ata janë arrestuar të enjten dhe pas intervistimit janë dërguar në mbajtje.
“Lidhur me rastin është raportuar se më 28.03.2024 janë arrestuar dy të dyshuar meshkuj kosovarë ku nga njëri prej tyre është konfiskuar një pistoletë që dyshohet të jetë përdorur në rast. Me vendim të prokurorit, dy të dyshuarit janë dërguar në mbajtje”, thuhet në raportin 24-orësh të Policisë.
Sipas njoftimit të Policisë, më 26 mars rreth orës 18:07, është raportuar se “pas një mosmarrëveshjeje mes katër personave, burra kosovarë, njëri prej tyre ka shtënë me armë zjarri dhe është larguar në drejtim të panjohur”.
“Në vendin e ngjarjes kanë dalë njësitet përkatëse policore ku kanë gjetur dhe konfiskuar 2 gëzhoja, një thikë dhe një shufër metalike”, thuhet në raportin e Policisë.
Ndërkaq, nga rasti nuk është raportuar për të lënduar.