Në një operacion të zhvilluar nga Njësia Rajonale për Hetimin e Krimeve Ekonomike dhe Korrupsionit në Mitrovicë të Jugut, tre persona janë arrestuar nën akuzat për vjedhje identiteti, legalizim të përmbajtjes së rreme dhe deklarim të rremë.
Ngjarja ka filluar pas një informate të pranuar nga zyrtarët e regjistrit civil për një person rreth moshës 30 vjeçare, i cili dyshohej se kishte paraqitur të dhëna të pavërteta të identitetit.
Siç ka njoftuar Policia e Kosovës, pas një hetimi të gjerë dhe në bashkëpunim me zyrtarët e Agjencisë së Regjistrimit Civil (ARC), hetuesit kanë zbuluar se i dyshuari, i identifikuar si J.K., kishte siguruar një ekstrakt lindje me plotësimin e deklaratave të rreme nga persona të tjerë.
Personat në fjalë janë identifikuar si Sh.H., i lindur në vitin 1968, dhe B.D., i lindur në vitin 1986, të dy njëkohësisht të akuzuar për përfshirje në tri veprat penale.
“Pas hetimeve të zhvilluara dhe bashkëpunimin me zyrtarët e ARC-së, është krijuar dyshimi se J.K., nuk është personi me të dhëna të vërteta. I dyshuari kishte siguruar ekstraktin e lindjes me plotësimin e deklaratave të rreme nga të dyshuarit: Sh.H., (viti i lindjes 1968, mashkull kosovar) dhe B.D., (viti i lindjes 1986, mashkull kosovar). Për rastin janë njoftuar organet e drejtësisë, ndaj të dyshuarve janë iniciuar rastet: ‘vjedhja e identitetit’, ‘legalizim i përmbajtjes së rreme’ dhe ‘deklarim i rrem’”, thuhet në njoftim.
Rastet e tre të dyshuarve janë njoftuar autoriteteve të drejtësisë dhe atyre u është caktuar statusi i të dyshuar në kuadër të rasteve të veprave penale për vjedhje identiteti, falsifikim dokumentash dhe deklarim të rremë.
Të dyshuarit janë intervistuar në prezencë të avokatëve mbrojtës dhe, me aktvendim nga prokurorja kujdestare, janë dërguar në mbajtje të paraburgimit për një periudhë prej 48 orësh.