Të dielën, një person është arrestuar në Gjakovë, pasi, i njëjti, në oborrin e shtëpisë së tij kishte fshehur substanca narkotike.
Sipas njoftimit të Policisë, thuhet se nga të dhënat policore personi i dyshuar ka qenë i arrestuar edhe më 3 mars të këtij viti nga Policia e Kosovës.
“Në vazhdën e hetimeve nga autoritetet e antidrogës më datë 30.04.2022, në ora 23:10 me urdhër nga organet kompetente të drejtësisë në Gjakovë, Policia e Kosovës ka realizuar një operacion bastisje në shtëpinë dhe objektet përcjellëse pronë e të dyshuarit të lartcekur dhe ka zbuluar se i dyshuari në vende të ndryshme, përmes metodave të ndryshme ishte duke fshehur substancë të dyshuar narkotike të llojit kokainë, e cila dyshohet se përdorej kryesisht për shitje apo konsum të brendshëm”, thuhet në njoftim.
Policia e Kosovës duke realizuar operacionin në shtëpinë e tij, ka hasur se, i njëjti, nëpërmjet metodave të ndryshme, ishte duke fshehur substancë të dyshuar narkotike të llojit kokainë.
Në gilinderat e oborrit janë gjetur të kapur me magnet një paketim i plastikës, i cili shërben për paketimin e vitaminave, dhe brenda saj janë gjetur 4 doza të mbushura me substancë narkotike.
Po ashtu, brenda oborrit të tij, përkatësisht, brenda ullukut që shërben për shkarkimin e ujërave atmosferik në shtëpinë e tij, janë gjetur 6 paketime plastike që shërbejnë për paketimin e magnesiumit dhe brenda të cilave kishte 225 doza substancë të dyshuar narkotike.
Gjithashtu nga i dyshuari janë konfiskuar një veturë, një telefon dhe para kesh.
Lidhur me këtë rast, është njoftuar prokurori kompetent dhe i dyshuari është ndaluar për 48 orë për procedura të mëtejme ligjore.
Ndërsa, Policia e Kosovës, ka bërë të ditur se me njësitet e saj të antidrogës në bashkëpunim me organet e drejtësisë po vazhdojnë punën përmes operacioneve aktive, në funksion të parandalimit dhe luftimit të dukurisë së abuzimit dhe trafikimit me droga dhe ndërmarrjen e masave ligjore ndaj të gjithë personave të përfshirë në vepra të tilla penale.