Policia e Kosovës ka arrestuar sot në Prizren një person të kërkuar, i cili ishte dënuar me 10 muaj burg efektiv për veprën penale të lidhur me narkotikë.
Sipas njoftimit, njësiti për realizimin e urdhëresave i Stacionit Policor në Prizren, pas veprimeve operative-hetimore, ka lokalizuar dhe arrestuar të dyshuarin Xh.K., mashkull nga Prizreni. Ai ishte në kërkim pasi ndaj tij ekzistonte një vendim i plotfuqishëm i Gjykatës Themelore të Prizrenit, me të cilin ishte dënuar me 10 muaj burg.
I arrestuari është shpallur fajtor për veprën penale “Shpërndarja e paautorizuar e narkotikëve”, sipas nenit 275 të Kodit Penal të Republikës së Kosovës.
Pas arrestimit, Xh.K. fillimisht është dërguar në Stacionin Policor në Prizren, ndërsa më pas është transferuar në institucionin korrektues për vuajtjen e dënimit.