Policia e Kosovës ka njoftuar se është arrestuar i dyshuari për kontrabandë me mallra dhe kalim të paautorizuar të kufirit në Leposaviq, të premten e 7 prillit.
“Njësitet policore kanë ndaluar të dyshuarin mashkull kosovar me veturën të cilën ishte duke drejtuar, nën dyshimin se i njëjti ka kryer veprat e lart-cekura”, njofton Policia.
Në raportin 24-orësh të Policisë bëhet e ditur se gjatë kontrollit në veturë të dyshuarit i janë gjetur dhe konfiskuar rreth 450 kg qese plastike në vlerë rreth 600 euro.
“Në konsultim me prokurorin, malli i sekuestruar dërgohet në terminalin doganor, ndërsa i dyshuari pas intervistimit është liruar në procedurë të rregullt. Rasti në proces hetimor”, thuhet tutje në raport.