Policia e Kosovës ka arrestuar një person të kërkuar me urdhër arrest ndërkombëtar, në kuadër të bashkëpunimit me INTERPOL-in dhe autoritetet e Shqipërisë.
Sipas Policisë, Drejtoria për Bashkëpunim Ndërkombëtar Policor, në koordinim me njësitë rajonale në Gjakovë, ka realizuar arrestimin më 10 maj rreth orës 13:10.
I arrestuari, shtetas kosovar me inicialet H.M., dyshohet për veprën penale “vjedhje e rëndë” dhe kërkohej nga autoritetet shqiptare përmes një urdhër arresti ndërkombëtar të lëshuar nga INTERPOL-i.
Me vendim të prokurorit kujdestar, i dyshuari është dërguar në ndalim policor për 48 orë, ndërsa procedurat e mëtejshme ligjore do të zhvillohen në bashkëpunim me institucionet kompetente.
Policia e Kosovës ka theksuar se mbetet e përkushtuar në zbatimin e urdhër arresteve ndërkombëtare dhe forcimin e bashkëpunimit ndërkombëtar në luftën kundër krimit.