Policia e Kosovës ka arrestuar një 24-vjeçare të dyshuar për disa raste të keqpërdorimit me kartela bankare në kryeqytet.

Sipas njoftimit, pas një pune hetimore dhe operative, Njësiti i Hetimeve të Kryeqytetit ka arritur të identifikojë dhe arrestojë të dyshuarën A.G., 24 vjeç.

Në koordinim me prokurorin, ndaj saj është iniciuar rast penal për veprën “Lëshimi i çeqeve pa mbulesë ose të rremë dhe keqpërdorimi i kartelave të bankës apo të kreditit”.

Policia ka theksuar se mbetet e përkushtuar në luftimin e veprimtarive kriminale dhe në sjelljen para drejtësisë të personave të dyshuar.

Po ashtu, ka apeluar te qytetarët që të kenë kujdes në mbrojtjen e të dhënave personale dhe bankare.