Arrestohet një 28-vjeçar në Prizren për fajde, e ngarkoi viktimën me kamata mbi 100 mijë euro
Policia e Kosovës ka arrestuar një 28-vjeçar në Prizren, i dyshuar për veprën penale të fajdes. Policia mëngjesin e së enjtes ka nisur operacionin për arrestimin e të dyshuarit, pas hetimeve në bashkëpunim me Prokurorinë Themelore në Prizren dhe një ekip nga Drejtoria e Krimit të Organizuar nga Drejtoria e Përgjithshme e Policisë -Prishtinë. Sipas […]
Policia e Kosovës ka arrestuar një 28-vjeçar në Prizren, i dyshuar për veprën penale të fajdes.
Policia mëngjesin e së enjtes ka nisur operacionin për arrestimin e të dyshuarit, pas hetimeve në bashkëpunim me Prokurorinë Themelore në Prizren dhe një ekip nga Drejtoria e Krimit të Organizuar nga Drejtoria e Përgjithshme e Policisë -Prishtinë.
Sipas hetimeve, i dyshuari E.K. ka kontraktuar një shumë jo proporcionale të pasurisë në këmbim të dhënies së borxhit, duke shfrytëzuar gjendjen e rëndë financiare të viktimës.
Viktima dyshohet se është ngarkuar me kamata mujore, të cilat e kanë tejkaluar shumën prej 100 mijë eurosh.
“I dyshuari E. K. , mashkull, 28 vjeçar me qëllim të përfitimit të kundërligjshëm të pasurisë, kontrakton një shumë dukshëm jo proporcionale të pasurisë në këmbim të dhënies së borxhit, duke shfrytëzuar gjendjen e rëndë financiare të viktimës, e ngarkon me kamata mujore viktimën, kamata të cilat e kalojnë shumën mbi 100000 (një qind mijë) euro”, thuhet në njoftimin e PK-së.
Gjatë operacionit, policia ka kontrolluar banesën e të dyshuarit dhe ka sekuestruar prova që ndërlidhen me rastin.
Pas arrestimit, ai është intervistuar në prani të avokatit mbrojtës dhe me vendim të prokurorit i është caktuar masa e ndalimit për 48 orë.
Rasti është duke u hetuar nga Sektori Rajonal i Hetimeve në Prizren.















