Një person është arrestuar të martën e nëntë gushtit pasi atij i janë konfiskuar mbi 27 kilogramë marihuanë.

Në njoftimin e policisë thuhet se në zbatim të operacionit policor, në fshatin Mramor të Prishtinës, është ndaluar një veturë me targa vendore.

“Hetuesit policorë nga Sektori Qendror i Drejtorisë për Hetim e Trafikimit me Narkotikë, pas pranimit dhe trajtimit të një informate rreth trafikimit me narkotikë, sot, më 09.08.2022 ora 12:00, kanë zbatuar operacioni policor ‘goditja’. Policia, gjatë kontrollit të veturës të cilën e ngiste N.N., (viti i lindjes 1988, mashkull, kosovar), ka gjetur dhe konfiskuar 27 kg. e 600 gr., substancë që dyshohet të jetë marihuanë”, thuhet në njoftim.

Konfiskimi i substancës narkotike

Po ashtu, janë sekuestruar edhe një veturë me targa vendore, 60 euro dhe 320 dinarë (monedha serbe).

Për veprimet lidhur me rastin është lajmëruar Prokurori i Shtetit pranë Prokurorisë Themelore të Prishtine dhe me urdhër të Gjyqtarit të Procedurës Paraprake është kryer kontroll te shtëpia e të dyshuarit (në fshatin Badofc i Ri Graqanicë), por nuk është gjetur asgjë e dyshuar.

Me vendim mbi ndalimin e personave nga ana e prokurorit, të dyshuarit i është caktuar masa e ndalimit deri në 48 orë.