Prokuroria e Shtetit, në bashkëpunim me Policinë e Kosovës, përkatësisht Drejtorinë për Hetimin e Krimit të Organizuar dhe sektorin e hetimeve rajonale të Policisë së Pejës, ka realizuar një aksion hetimor që rezultoi me arrestimin e një personi të dyshuar për fajde.
Personi i dyshuar u arrestua dhe u ndalua për 48 orë, bazuar në urdhrin e prokurorit të shtetit.
Lajmin për Dukagjinin e ka konfirmuar zëdhënësi i Prokurorisë në Pejë, Shkodran Nikçi, i cili ka thënë se i dyshuari do të intervistohet nga hetuesit policorë.
“Pas arrestimit, i dyshuari do të intervistohet nga hetuesit policorë, kurse prokurori i shtetit ka urdhëruar që i pandehuri të ndalohet për 48 orë. Brenda afatit ligjor, prokurori i shtetit do t’i ndërmarrë veprimet ligjore për sigurimin e prezencës së të pandehurit në procedurë penale”, ka thënë Nikçi.
Prokuroria e Pejës u bën apel të gjitha viktimave të fajdeve që të raportojnë rastet e tyre pa hezitim te Prokuroria e Shtetit apo Policia e Kosovës.