Policia e Kosovës ka njoftuar se të enjten, njësiti FAST-Kosova, në bashkëpunim me autoritetet ndërkombëtare të zbatimit të ligjit, ka bërë arrestimin e një personi të kërkuar nga INTERPOL-i.
“Në kuadër të këtyre përpjekjeve për parandalimin dhe luftimin e veprave penale përfshirë edhe luftimin e kriminalitetit që kalon kufijtë shtetëror, në veçanti identifikimin dhe arrestimin e personave të kërkuar që provojnë t’i ikin drejtësisë, sot më 12.10.2023, njësiti FAST-Kosova nga Drejtoria për Bashkëpunim Ndërkombëtar në Fushën e Zbatimit të Ligjit e PK-së, kanë arritur ta arrestojnë një person në kërkim nga INTERPOL-i”, thuhet në njoftimin e Policisë.
Personi i arrestuar është kërkuar me urdhër arresti ndërkombëtar nga autoritetet e Shqipërisë nën dyshimin për veprimtari penale të “kultivimit të bimëve narkotike”.
Pas arrestimit, me vendim të prokurorit i dyshuari është dërguar në mbajtje për procedurat e mëtejshme ligjore.