Policia e Kosovës ka arrestuar një serb në komunën e Vushtrrisë që dyshohet për krime lufte në Kosovë.
Sipas njoftimit, i dyshuari është arrestuar në Jarinjë, i identifikuar me iniciale S.N, për veprën penale “krime lufte kundër popullsisë civile” të kryer gjatë viteve 1998-1999 në komunën e Vushtrrisë.
“Në vazhdën e hetimit të krimeve të luftës, Policia e Kosovës në këtë rast Departamenti i Policisë Kufitare në bashkëpunim me hetuesit policorë nga Drejtoria për Hetimin e Krimeve të Luftës, kanë ndaluar personin e dyshuar mashkull/serb (S.N.) viti i lindjes 1964 në komunën e Vushtrrisë, në cilësinë e personit të dyshuar për krime lufte”, thuhet në njoftim.
Personi i dyshuar është dërguar në polici dhe pritet të intervistohet në prezencë të avokatit mbrojtës, ku të gjitha procedurat e mëtejme do të ndërmerren në bashkërendim me organet e drejtësisë.