Tabelat e komunikacionit me shenja vendi në veri të Kosovës u zëvendësuan të enjten me tabela dygjuhëshe. Të njëjtat tashmë shkruhen në gjuhën shqipe dhe atë serbe.
Por, vendosja e shenjave zyrtare në gjuhën shqipe nuk është mirëpritur nga disa serbë, të cilët kanë dëmtuar disa prej tyre.
Policia e Kosovës ka arrestuar një person, shtetas i Serbisë, për shkak se i njëjti dyshohet se i ka dëmtuar dy shenja të trafikut.
Në raportin 24-orësh të policisë thuhet se i dyshuari është dërguar për procedim në gjykatën për kundërvajtje.
“Leposaviq / 16.03.2024 01:45. Është arrestuar i dyshuari mashkull/s, shtetas i Serbisë për shkak se i njëjti dyshohet se i ka dëmtuar dy shenja të trafikut. I dyshuari me vendim të gjyqtares është dërguar për procedim në gjykatën për kundërvajtje”, thuhet në raport.
Rasti në raportin e policisë është cilësuar si “vandalizëm”.
Ndryshe, ministri i Infrastrukturës, Liburn Aliu ka njoftuar se do të zëvendësojnë të gjitha shenjat që kanë qenë në gjuhën serbe.