Një shtetas i Serbisë është arrestuar në Mitrovicë, pasi dyshohet se i ka ofruar 20 euro ryshfet një zyrtari policor, në këmbim të shmangies së një gjobe për kundërvajtje.
Sipas njoftimit të Policisë së Kosovës, i dyshuari ishte ndaluar nga një njësi policore, e cila po përgatiste tiketën për kundërvajtje. Në atë moment, ai dyshohet se i ka ofruar policit një kartëmonedhë prej 20 eurosh, me qëllim që të mos i shqiptohej gjoba.
“Është arrestuar i dyshuari, shtetas i Serbisë, pasi që i njëjti, derisa njësiti policor ishte duke i shqiptuar një tiketë kundërvajtje, në këmbim të mosshqiptimit të tiketës u ka ofruar një kartëmonedhë prej 20 eurosh”, thuhet në njoftimin e Policisë së Kosovës.
Pas intervistimit, me vendim të prokurorit, i dyshuari është dërguar në mbajtje.
Rasti është iniciuar si “Dhënie e ryshfetit”.