Policia e Kosovës ka njoftuar se një zyrtar i Agjencisë së Pyjeve të Kosovës është arrestuar nën dyshimin për keqpërdorim të pozitës zyrtare dhe përfshirje në kontrabandë me dru në fshatin Shahiq të Kamenicës.
Sipas policisë, rasti është zbuluar gjatë realizimit të veprimeve operative në terren, ndërsa i dyshuari është shoqëruar për procedura të mëtejshme hetimore.
Sipas Policisë, rasti ka ndodhur të mërkurën kur në fshatin Shahiq, gjatë patrullimit policor është ndaluar një kamion i drejtuar nga një mashkull kosovar, i ngarkuar me dru që dyshohet se po transportoheshin nga territori i Serbisë në Kosovë.
Gjatë kontrollit të dokumentacionit përcjellës, hetuesit kanë dyshuar se një zyrtar i Agjencisë së Pyjeve ka bërë në mënyrë të kundërligjshme damkosjen e druve dhe ka lëshuar fletëpërcjelljen për transportin e tyre.
Me vendim të prokurorit, sasia e druve është sekuestruar, ndërsa zyrtari i dyshuar është arrestuar dhe dërguar në mbajtje.