Dushan Neshiq, me kombësi serbe, është arrestuar në Jarinjë – vendkalim kufitar në mes të Kosovës dhe Serbisë.

Lajmin e ka konfirmuar për Dukagjinin zëdhënësi i Policisë së Kosovës për rajonin e veriut, Veton Elshani.

“Personi është ndaluar të hënën rreth orës pesë të mëngjesit, teksa po hynte në Kosovë nga Serbia. I dyshuari është ndaluar për 48 orë dhe gjendet në stacionin policor në Mitrovicën e Jugut”, ka thënë Elshani.

Sipas tij, Neshiq është arrestuar në bazë të një urdhri gjyqësor për një rast të vitit 2022, që ka të bëjë me “kërcënime”.